政壇：律師會換血 林新強裸退
相信大家仲記得，香港律師會舊年爆發「倒林」風波，原會長Ambrose林新強因公開力撐中央，被一批泛民主派背景嘅律師會員發動倒閣，最終喺緊急會員大會上大比數通過罷免動議，Ambrose被迫黯然下台，由原副會長熊運信臨時頂上，但Ambrose仍然保留住律師會理事嘅身份。律師會尋晚舉行周年會員大會兼換屆選舉，Ambrose決定「裸退」放棄角逐連任理事，其空缺由知名人權律師帝理邁（Mark Daly）補上。
轉行中間多元路線
阿Mark曾經去信質疑上屆理事會支持人大「八三一」決定，律師會今次「換血」，唔知係咪意味該會將轉行中間多元路線，唔會再經常撐政府同撐中央呢？
Ambrose接受我哋查詢時話，今次棄選律師會理事，主要係想放番多啲時間喺律師樓工作，尤其係喺前海嘅業務，與政治無關。但有理事分析，Ambrose喺上次「倒林」風波中大敗，連佢自己都覺得意外，質疑有啲表面話支持佢嘅人，喺最後關頭轉咗軚或一開始就口不對心，佢好可能係覺得「冇癮」同失去互信而決定「裸退」。
接替Ambrose席位嘅阿Mark，近年喺政治上唔算太活躍，但喺維護人權自由方面就出晒名，包括早年協助居權人士告政府，之後又專幫弱勢社群同少數族裔打官司，近年則專門協助啲酷刑聲請者，現為律師會憲制及人權事務委員會委員，同以往幾乎清一色為保守親建制人士嘅律師會理事會好似格格不入。有說今次阿Mark入閣，係得到熊運信等人默許，以便喺「倒林」風波後重建律師會形象，為理事會引入不同聲音。
