立會烏煙瘴氣 政客醜態百出

呢，話口未完，尋日立法會又上演一幕議員互罵嘅鬧劇嘞。話說工務小組委員會討論啟德體育園區前期工程撥款申請，唔使問都知，反對派政客一於大搞不合作運動，有人引用《議事規則》要求會議中止待續，有人點名嘲諷建制派議員冇睇文件。喺一片吵吵鬧鬧之中，撥款申請雖然獲得通過，但反對派政客繼續發難，直斥建制派過去盲目支持工程項目，導致「超支又超支」，批評佢哋係「狗奴才」。建制派議員梗係不甘受辱啦，反指對方拉布阻撓工程，係「人渣」。雙方爭持不下，搞到面紅耳熱，最後有人憤而離席，事情先至告一段落。

講到呢度，大家係咪覺得匪夷所思呢？堂堂立法會議員好似小學雞咁，你鬧一句，我還一句，唔知嘅仲以為返咗去幼稚園添。最難頂嘅係，反對派政客惡人先告狀，明明係佢哋不斷拉布，搞到大量工程延誤超支，居然仲好意思賴人哋，呢啲咪叫做戾橫折曲、顛倒是非囉。

講起就激氣嘞，呢班所謂嘅立法會議員，高薪厚祿，但就不務正業，淨係識得為反而反，唔係拉布就係流會，唔係擲物就係爆粗，正一有破壞冇建設。最離譜嘅係，民主黨議員何俊仁甚至喺議事堂上睇艷照，因此獲得「AV仁」嘅稱號，問你服未。

呢，淨係今個年度嘅財政預算案咋，反對派破天荒提出近四千項修正案，擺明玩嘢喇。雖然最後被立法會主席大幅刪減至六百多項，但仍然有排拗，預算案受阻，惠民措施難免被拖延，最終咪又係基層市民受害！

今時今日，行政立法互相扯皮，議員狗咬狗骨，搞到議事堂好似鬥獸場咁，市民早就見怪不怪咯。最好笑嘅係，反對派內部其實亦係面和心不和，淨係政改問題咋，就各懷鬼胎，醜態百出。所以話，立法會被譏為「垃圾會」，真係一啲都冇講錯。

冇計嘞，港府無能，政客無良，成個社會七國咁亂，立法會又點可能唔烏煙瘴氣吖。再咁落去，香港注定冇運行，分分鐘打回原形，變番小漁村都似，叮！