尋日宣萱以愛心大使身份出席遺傳性癌症公眾教育活動，佢話一向有進行身體檢查嘅習慣，又話：「卵巢就一年檢查一次，呢個係必需嘅，至於乳房就唔使每年驗，年輕時三年驗一次，依家上身平均二至三年驗一次，下身就一年一次，不過都開始要驗密啲啦，因為年紀開始大。」

宣萱（左）同唐寧都係注重健康嘅名人。

佢話希望可多做關乎女性健康嘅慈善活動，又話：「因為身體真係好緊要，但同時知道好多人都諱疾忌醫，可能人生經歷，我學識咗寧可早啲面對任何事。」講到瘦身問題，佢慨嘆自己已回不到昔日嘅體重：「舊年接咗美容院代言廣告時就一百一十七磅，但以前只係一百零八磅咋，我相信如果自己有恒心做運動同節食，可以返到去呢個磅數，但係年紀唔容許我咁做，不過都希望可以瘦番啲，但要健康行先。」

同場嘅唐寧就話以往只會做普通嘅身體檢查，又話：「會抽血驗吓，但依家生咗小朋友就要重點去檢查，要留意多啲自己身體健唔健康，因為你會想陪伴佢哋耐啲，仲要學識養生，生活得健康啲，而運動絕對幫到手，加上可令小朋友由小培養做運動嘅習慣，雖然我自己都覺得辛苦，但畀個好習慣小朋友係好嘅。」

第一手消息請下載on.cc東網iPhone/iPad/Android/Windows Phone Apps