城中鏡：上影影：林燕勝下鄉 搞「便便工程」
銀行家返內地睇廠係等閒事，但恒生企業及商業銀行業務總監Donald林燕勝今趟去雲南就好唔同，Donald「驗貨」之餘，竟然要送禮！冇錯，要送禮，兼且要「教書」，連Donald都話咁樣都係第一次，原來係關「便便」嘅事。
林燕勝（左）帶領恒生義工檢驗新建沼氣設施，並向村民贈送禮物。
林燕勝喺當地農村小學講解沼氣設施嘅好處。
咪睇小「便便」嘅威力，「便便」發酵釋出嘅沼氣，可以轉化為能源。恒生一早已經同環保組織合作，喺雲南資助興建多個沼氣設施，幫啲農戶改建豬欄、廁所、廚房，用人同豬「便便」釋出嘅沼氣嚟煮飯同照明。發酵完剩番嗰啲，仲可以用嚟餵魚種菜做肥料添。
Donald今次帶住班義工，去當地農村驗收舊年完工嘅沼氣能源設施，佢仲去埋當地小學講解沼氣能源知識，仲向村民送義工織嘅「溫暖牌」頸巾添。今次都係Donald嘅第一次，佢話又難忘又感動。
呢個沼氣能源計劃，恒生已經做咗八年，打算總數起四千六百個設施，縮減嘅碳排放，可以保護到等於一百一十五個九龍公園咁大嘅樹林。
