政壇：MPF達人教投資方程式
呢排港股熱炒，唔係個個人都睇股咁準，有啲人就諗住將份強積金All In落港股基金嗰度，諗住有基金經理睇實，又叫做湊熱閙有入過吓市。點知德盛安聯中華及東南亞機構業務總監Elvin余天佑話大錯特錯，佢呢位MPF達人話「分分鐘等你轉得嚟，個市都升完啦。」
睇嚟方健儀都喺余天佑（左）身上學到唔少MPF嘅投資貼士。
德盛安聯呢個退休信心調查發布會，擔任MC嘅前主播方健儀都話自己一向比較懶，又唔識投資股票，通常都係等轉工先睇吓個MPF戶口。Well，方健儀對上兩次轉工，好似隔咗成六年……
個市係咁升，唔通淨係得個睇字？Elvin安慰話中港同亞洲股市嘅回報前景，的確好過債市，長遠投資角度嚟講，大家確實可以諗諗加大MPF入面嘅股票比重。
咁點加法？Elvin教路，坊間有條Formula：「100減歲數=投資股票的理想佔比」，可以參考嚟調整投資組合。假若閣下二十五歲，100-25=75，即是可以擺75％落股票度喇。不過，重點都係要分散投資，咪諗住All In。仲有，就係咪真係當自己年年二十五歲。
