泛民主派尋日繼續喺立法會就辯論財政預算案「拉布」，非常沉悶，反而見到工聯會議員「嫻姐」陳婉嫻就眼前一亮，講緊嘅係佢戴住一條寫住Dream Big嘅星星圖案頸鏈，睇落好特別。佢話條鏈係本地年輕人嘅手作，可以時刻提醒佢，人若冇夢想，同殭屍無乜分別喎。見嫻姐一臉倦容，原來佢已經失眠大約半個月，日日只係瞓四個鐘，唔怪得個樣咁攰。嫻姐無講點解失眠，唔通係因為工聯會理事長吳秋北近來成日講錯嘢，搞到嫻姐擔心到失眠？
