前兩日先講過，立法會議員EQ葛珮帆為全港婦女出頭，就爭取政府資助女性檢查乳房預防乳癌，但一直冇進展，眼見咁樣拖落去唔係辦法，於是向食物及衞生局局長高永文挑機，質疑高永文身為男人，似乎唔多關心乳癌呢件「女人心事」。又再慢半拍嘅白鴿黨議員「一舊雲」黃碧雲明知已經被截胡，都要執EQ口水尾，公布三月已經完成嘅問卷調查，促請政府推廣檢查乳房嘅訊息，兼資助婦女進行乳房Ｘ光造影檢查，同免費嘅大腸癌篩查計劃睇齊，認真後知後覺。

話白鴿黨「最兜踎」

一舊雲尋日率領屯門區議員陳樹英等女黨友，公布調查指四成二受訪婦女冇檢查乳房嘅習慣，又指乳房Ｘ光造影檢查太貴，希望政府全額資助。不過，被問到白鴿黨會唔會帶頭資助婦女做住檢查先，一舊雲率先幫自己倒米，話白鴿黨「最兜踎」，自己都係因為任教理工大學先可以免費做身體檢查，順便檢查埋乳房喎，最多平日沖涼嗰陣，自己檢查吓。

雖然一舊雲自己都唔係年年準時檢查，但佢就將矛頭直指高永文，話多年嚟都係由男士出任食衞局局長，導致政策都冇從女性角度出發；佢仲再執黨友劉慧卿口水尾，話gender budgeting，即係將社會性別觀點納入預算編制都好重要。

跟住佢再將責任提升到財爺「鬍鬚曾」曾俊華身上，話財爺呢個位多年嚟都係男士揸莊，連財政撥款都冇特別考慮女性權益，反映女士參政嘅重要性喎。咁都有得抽水，建議白鴿黨與其執人口水尾搞預防乳癌，倒不如整頓吓班乳鴿先啦！

第一手消息請下載on.cc東網iPhone/iPad/Android/Windows Phone Apps