度假營地無王管 樂極生悲有可能
春暖花開，萬物生長，復活節又到嘞。呢個季節最適合郊遊散心，不過咁，散心還散心，最緊要注意安全，以免樂極生悲吖。上個禮拜之嘛，南韓仁川海邊營地發生火警，奪去五條人命，問你怕未。
唔好以為唔關香港事吖，同類慘劇隨時喺香港重演o架。嗱，近排新界出現唔少以充氣營帳為招徠嘅度假營地，唔止夠新潮，而且夠豪華，年輕人趨之若鶩。本報記者實地考察發現，新界一間開業半年、以觀星為賣點嘅豪華營地，唔止有透明波波營帳、豪華露營車，仲有貨櫃屋及小酒窖，收費由一千幾到五千幾元不等。據職員透露，嚟緊嘅復活節假期，所有營帳已經租出，簡直生意滔滔，其門如市。可惜吖，呢啲度假營地除咗涉嫌無牌經營旅館、無牌賣酒，亦涉嫌違反地契條款，可以講係問題多多，危機處處，有乜冬瓜豆腐，隨時死得人多。
究竟有乜問題？首先，呢啲充氣波波營帳百分百透明，冇遮冇掩，外面一眼睇晒，私隱度為零，女住客人身安全毫無保障。其次，露營車外面可以燒烤，裏面可以煮食，係咪符合消防條例冇人知，萬一發生意外，分分鐘一鑊熟。仲有吖，營地涉嫌無牌出售酒類飲品，更係一個大問題。
正如法律界人士指出，就算呢啲度假營地唔係固定建築物，只要長期營運及收費，都受《旅館業條例》規管，而小食亭私自賣酒亦可能違例。
聽吓政府部門點回應吖？地政總署話喎，有關地點建有多間未經批准嘅建築物，違反地契，當局已發出警告信，要求業權人糾正；民政事務總署就聲稱已接獲相關投訴，正調查同跟進；而食環署亦證實，相關營業點並冇有效酒牌。
咁都得？呢個度假營地已經開業半年，各部門明知違法，但一直闊佬懶理，冇採取任何行動，咁即係失職嘅啫。大吉利是講句，萬一唔好彩出事，甚至搞出人命，呢隻鑊邊個孭吖？
正所謂，世不患無法，而患無必行之法。港府監管不力，執法不嚴，無牌旅館遍地開花，早已備受詬病，家陣連度假營地都放任自流，搞到危機處處，更係罪加一等。有立法會議員睇唔過眼，要求當局加強規管同巡視。其實計太一叮話齋，官僚靠得住，豬乸會上樹，與其旨意當局加強規管同巡視，不如自求多福，遠離是非之地，叮！
