港鐵近年負面消息多籮籮，小至處理小狗墜軌意外，大至虛報高鐵工程進度等，幾乎單單都係被外間指為「公關災難」，港鐵都要救亡。據悉，佢哋計劃新增公關總監一職，並且開出五百萬元年薪「超筍價」四出挖角，包括幾個前高官。最新消息指，曾任商務及經濟發展局（商經局）副秘書長、現任香港工業總會（工總）行政總裁嘅蘇家碧（Linda）係總監大熱人選，如落實，就要瞓身投入為港鐵省靚招牌。

據了解，確有大企業正向Linda招手，但Linda喺工總仲有半年先約滿，所以能否成功跳槽仲有變數。我哋嘗試向Linda求證，但一直未獲回覆。港鐵就話會不時因應業務發展需要，檢討同調整公司管理層架構，任何聘請總監嘅工作都係由董事局嘅遴選委員會負責，但目前冇進一步資料提供喎。

五百萬元年薪嘅總監位聽落好筍，但據知呢個位都係名副其實嘅燙手山芋，好似港鐵獨立董事委員會去年就高鐵工程延誤發表調查報告，已經點名批評包括港鐵公關部在內等多個部門連番失誤，更傳有人遭報告批評而要孭鑊。不過Linda飽經官場歷練，曾經做過時任政務司司長「貪曾」曾蔭權嘅新聞秘書；之後任保安局首席助理秘書長，喺處理南亞海嘯同埃及車禍嘅災後統籌工作亦獲各方好評。離開政府前佢官至商經局副秘書長，月薪高達十四萬元，其後自願減薪一半、跳槽至康文署任市場及業務拓展總監，一年後再轉任工總。

第一手消息請下載on.cc東網iPhone/iPad/Android/Windows Phone Apps