政壇：梁美芬多幅橫額被鎅毀
今明兩年都係選舉年，街上嘅政黨宣傳橫額同直幡，睇怕會愈來愈多，而惡意破壞嘅情況都可能會趨頻密，立法會議員梁美芬就率先做咗受害者。
梁美芬同助理嘅宣傳橫幅被人整齊鎅爛。（受訪者提供）
梁美芬
早前佢喺區內掛咗多幅有關財政預算案嘅宣傳橫額，近日就發現畀人用鎅刀鎅爛佢同助理陳國偉嘅樣貌，就連西九新動力同梁美芬個名都鎅埋，鎅爛橫額嘅人似乎做得好有技巧，刀口整齊。
梁美芬狠批有關行為非常無品，認為就算大家有唔同政見，都唔應該採取呢種方式表達意見喎。
黃國健直幡亦遭殃
講開宣傳品被毀，工聯會議員黃國健喺牛頭角振華道嘅直幡，尋日亦懷疑畀人淋腐蝕性液體，地區幹事李嘉恒話，有義工喺朝早收回直幡時中招，要即時入院治療，工聯會已就事件報警，暫時未知係咩人所為。
