政壇：燒鵝店名人當食環諮委
多個政府諮詢架構換屆執位，其中醫學專家雲集嘅食物及環境衞生諮詢委員會，尋日公布委任十一名新成員，喺芸芸委員中，我哋搵到深井陳記燒鵝後人陳偉明嘅名，佢以荃灣區議員身份加入委員會，同一眾醫生、教授共事。該委員會過去曾就防控禽流感、「劣質豬油」事件等食安問題提交意見。
陳偉明
另外，民政事務局轄下嘅公民教育委員會主席就由選前大熱、律師會首位女副會長彭韻僖接任。據悉年約五十歲嘅彭韻僖早年曾任東區委任區議員，又做過「青少年軍」前身、青少年軍事夏令營籌委會主席，相信公民教育委員會喺佢掌舵下，公民教育政策將會殺出一條新血路。其他新委員包括百仁基金主席、理文造紙主席李文俊、兼任青年事務委員會委員嘅林長志等。
至於房屋委員會就出現政黨成員新舊輪替，包括工聯會黃國健、民建聯葉國謙、自由黨方剛同公民黨梁家傑下月「起身」，分別由佢哋嘅黨友郭偉強、張國鈞、張宇人同郭榮鏗接棒。
