政壇：鬍鬚曾厚顏認叻晒政績
財政司司長曾俊華（鬍鬚曾）做咗財爺八年，問到佢最為人熟知嘅政績，估計好多市民都會答「年年計錯數」！不過，偏偏鬍鬚曾對自己任內嘅感覺良好，尋日出席午餐會時，不但大講八年政績，仲明言喺佢帶領下，今年政府有四百五十億元投資收益，如果無咗呢份收入，淨係加薪俸稅，每個納稅人就要交多超過八成薪俸稅，所以搞未來基金係好有道理嘅。鬍鬚曾講到自己成個不加稅救星咁，咁「孤寒財爺」呢個花名又點嚟o架？
佢尋日喺個午餐會上大講上月發表嘅財政預算案，又一副專家姿態，教在場人士要積穀防饑，講到過去八年嘅工作，佢自吹自擂話根據佢八年來嘅往績，預算數字同實際數字嘅差額好大，亦都好可觀，所以支持佢繼續做財爺，先至可以確保政府有足夠收入應付長遠需要喎，認真大口氣！
推銷三跑稱可雙贏
不過，鬍鬚曾之後補咗句，話知道自己做財爺令大家都唔多滿意，為免損害大家用餐雅興，都係唔再講喇，弊在轉個頭，佢又晒自己嘅威水政績，話由○七年至今政府開支增加最少一倍，但庫房依然有盈餘，唔相信世上有其他地方可以做得到喎！
跟住佢又用最鍾意嘅劍擊，推銷機管局計劃興建機場第三條跑道計劃（三跑），佢話，劍擊運動員要有好體能先可以發揮到最好，就好似香港需要三跑配合發展，佢話爭議最大嘅珠三角空域擠塞問題，唔應該以零和遊戲方式看待，其實係有機會搵到雙贏方法喎。佢又話，為配合一帶一路戰略發展，港府正積極研究加入亞投行，開拓新商機。
