車牌隱形避快相 警方執法莫隱形
早前網上流傳有警員扮樹影快相，令人嘆為觀止，其實，道高一尺，魔高一丈，無論警方點樣出盡法寶，一樣有人諗到辦法破解。呢，有司機出動遙控車牌變換器，亦有司機利用手機app通報警方快相同雷射槍位置，家陣仲有人引入車牌隱形噴劑添，直頭係五花八門，無奇不有。
係咁嘅，交諮會早前建議將俗稱「牛肉乾」嘅司機違規定額罰款大幅提高四成，網上議論紛紛，有人上傳一段短片，介紹一種聲稱可以逃避快相機同衝紅燈相機嘅「車牌隱形噴劑」。有車主購入後託本報交畀專家測試，發現果然有效，車牌用咗噴劑後，無論高拍抑或低炒，車牌號碼喺閃光燈下通通隱形，都幾神奇o架。
不過咁，神奇還神奇，呢啲始終係旁門左道，千祈唔好以身試法吖。正如有法律界人士話齋，將隱形噴劑用於車牌上，即違反道路交通條例，而售賣呢啲產品嘅人，亦有機會被警方控以協助或教唆他人犯法罪名。仲有吖，使用噴劑後嘅車牌會留下保護膜痕迹，好易被警方發現，分分鐘唔衰攞嚟衰嘅咋。
話時話，政府成日宣傳「路上零意外，香港人人愛」，查實應該改為「超速多意外，香港人人怕」就差唔多。早排之嘛，兩個飛機師駕駛跑車懷疑超速，結果失控撞埋橋躉爆炸，搞到車毀人亡，問你怕未。至於每逢周末聯群結隊出沒嘅非法賽車黨以及亡命小巴，簡直狼過賽車手，更加令人聞風喪膽。總而言之，打擊超速駕駛，確保道路安全，絕對係警方嘅責任，千祈唔好畀隱形噴劑呃到吖。
咪話太一叮唔提醒，復活同清明長假就到，又係飆車族蠢蠢欲動之時，由得馬路炸彈橫衝直撞，隨時爆大鑊o架。最令人擔心嘅係，警方影快相本來就甩漏多多，偵速攝影機同衝紅燈攝影機有唔少盲點，如果再加埋車牌識隱形，警方豈不是成為無牙老虎？
講開馬路危機，又點止超速咁簡單吖。審計署之前揭發當局執法甩漏多宗罪，包括警方以酒精呼氣測試打擊醉駕效用成疑、公共交通工具安全措施欠佳、超過九成小巴乘客唔戴安全帶、巴士司機體檢寬鬆等等，情況多年來都冇改善，旨意港產官僚保障市民安全喎，蚊都瞓蛇都死喇。
一句到尾，車牌隱形避快相，警方執法莫隱形。人命關天，千祈唔好瞌眼瞓吖，叮！
