政壇：搞搞政：阿王爆貪曾剛愎唔聽勸
基本法委員會委員陳弘毅日前建議，就政改爭議舉行電視辯論，社會有唔少討論，繼政制及內地事務局局長譚志源重提當年幫「貪曾」前特首曾蔭權爵士搞電視辯論令佢「後悔莫及」後，工聯會立法會議員王國興（阿王）亦大爆，當年曾喺建制派飯局中力勸貪曾唔好制，可惜對方自信心爆棚，唔聽人講，結果畀對手、即「五區公投」總發言人余若薇狂砌一粒鐘，表現之差令人慘不忍睹，咁多年阿王都未敢淡忘，睇怕當時恨不得塞住貪曾把口都似。
設計圖片及對白
話說貪曾喺一○年五月致函時任公民黨（公文袋）黨魁余若薇，邀請佢喺六月中就一二年政改方案進行一場電視直播辯論，此舉隨即惹嚟各黨派不滿，建制派內都流傳唔少陰謀論，包括質疑有關做法變相幫喺公投大敗嘅余若薇同公文袋翻身。結果一如所料，貪曾喺電視辯論嘅表現比外界預期更差，令佢民望進一步插水，建制派甚至流傳佢係特登慘敗，焗中央出手打救政改，放行民主黨嘅區議會方案。
疑港英餘孽暗助泛民
要知道，當時五區公投投票率只得百分之十七點一，創下歷來立法會大選、補選最低紀錄，可見公投派民意幾低，仲枉嘥咗一點五九億元公帑添。阿王話，佢由頭到尾都唔贊成、唔認同搞電視辯論，一來貪曾冇乜辯才，二來係貪曾出名臭脾氣，容易黑面，公開辯論衰梗啦。事隔多年，佢諗番轉頭，覺得貪曾可能真係想幫公文袋造勢，唔係點會咁蝕底都肯做。貪曾一直被指為港英餘孽，同泛民眉來眼去，friend過打band，陰啲陰啲幫手有乜出奇啫！
