本港農業嘅可持續發展喺去年底開始為期三個月嘅諮詢，諮詢期將近完結，鄉議局尋日搞咗個香港新農業政策研討會，仲請咗食物及衞生局局長高永文等政府官員出席解畫。不過，高永文尋日狀態麻麻，見佢戴住口罩，聲都沙晒，莫非佢都中招染流感？高永文就澄清話唔係流感，只係失聲喎。不過，失聲點解要戴口罩呢？莫非佢係死撐唔認中招？抑或係驚感染做定預防呢？

高永文自稱失聲要戴口罩。

但高永文之後同鄉紳影相又貪靚除口罩。

當大家再追問高永文點解失聲時，佢就用隻手指住個口，再加埋其他手勢解釋因為講得太多嘢，所以搞成咁喎。在旁嘅新聞秘書都笑佢，問佢喺研討會致辭時係咪要破天荒用手語喎。咁當然梗係冇用手語啦，但致辭就好簡短嘞。都好嘅，起碼佢唔使講得咁辛苦，在座嘅人亦唔使耳仔受罪。不過，高永文同班鄉紳影相又貪靚除低個口罩喎，如果佢真係中咗招，班鄉紳就要小心啲喇！

第一手消息請下載on.cc東網iPhone/iPad/Android/Windows Phone Apps