政壇：反水客亂搞飲食界嗌慘

反水貨客亂象持續，除零售業界受累，食肆亦受影響。現代管理（飲食）專業協會主席黃永幟話，收到有會員反映，話酒樓畀示威者硬闖後指罵客人，嚇走茶客之餘，顧客仲驚到過門而不入，估計損失數萬元生意。

胡珠（左）與香港餐務管理協會會長潘權輝為保生意各出奇謀。

邱金榮（左）成功喺中大開食堂，身旁黃永幟都戥佢開心。

幟哥話業界要面對租金高、人工貴等問題，唔少舖頭賺埋僅夠交租，例如新年期間，俗稱「炒散」嘅兼職空缺，時薪去到七十至九十元，加埋近日示威衝擊，真係無啖好食。新光集團創辦人胡珠講起應付示威者都好頭痛，佢話為免小事化大會先發制人，安排女同事或侍應喺門口擋駕，勸走示威者。

至於喺佔領行動期間，結束旺角間米線店嘅稻苗學會主席邱金榮，總算苦盡甘來，月前喺中文大學開學生飯堂，開業三個月生意唔錯。佢笑言多得班男拔萃書院舊生，升讀中大後繼續幫襯，認真有人情味。