政壇：肥亨借長腿「彤」叔籲施恩

商務及經濟發展局前局長馬時亨（肥亨）尋日出席年度傑出學生選舉午餐會演講，仲分享新世界同周大福集團創辦人鄭裕彤（彤叔）當年抱住施恩莫望報嘅心態，飾演「長腿叔叔」資助一個窮小子負笈英國讀書，滴水之恩反而獲呢位窮小子湧泉相報，勁賺幾十億元嘅故事。

馬時亨（圖）透露彤叔當年資助一名窮小子赴英讀書，昔日滴水之恩後來獲湧泉相報。

肥亨透露，當年有個窮小子因為冇錢讀書，膽粗粗寫信向當時已經係超級富豪嘅彤叔自薦，希望對方可以資助佢幫輕吓學費壓力，點知彤叔一口應承，其後仲資助呢個後生仔赴英讀書。咁啱得咁蹺，呢位後生仔嘅大學同房就係內地一個國家級領導人嘅兒子，二人其後仲做咗好朋友。

巧合嘅係，呢位獲「長腿叔叔」資助嘅青年其後得知大學同房喺內地開設上市民企，隨即諗起彤叔，民企亦獲彤叔泵水支持。故事發展到最後，係彤叔因為呢單交易帶挈勁賺幾十億元。其實肥亨想借彤叔呢個故事，鼓勵年輕人盡力幫有需要嘅人，他日總會好人有好報咁話。