政壇：學聯改選 爆狙擊風波
香港專上學生聯會近來風雨不斷，多間院校內部相繼發起退聯行動，風雨飄搖之際，學聯又要改選，原本呢場大龍鳳有既定劇本，傳已內定由前學聯常委、嶺南大學學生羅冠聰做新秘書長，點知臨尾殺出個程咬金，「熱血公民」成員、中文大學學生司徒子朗忽然宣布參選，為呢場無高潮嘅選舉加一啲火花。
設計圖片
司徒子朗佔領曾被捕
羅冠聰係嶺大三年班學生，一直被指係「內定」接替周永康嘅人選，而學聯原班底亦視秘書長之位為囊中物，尋日學聯舉行周年大會同選舉投票，同樣係學聯常委、一二年加入熱血公民嘅司徒子朗竟宣布參選，令選舉忽然偏離劇本。
司徒子朗嘅政治聯繫好豐富，曾係社民連會員，亦做過「人民力量」嘅支持者，一二年加入熱血公民，又做過立法會議員黃毓民嘅政策研究助理。近年，佢熱心參與社運，去年佔領行動清場時，仲一度被捕，被控以刑事藐視法庭罪。今次司徒子朗忽然參選，雖然贏面好低，但起碼令羅冠聰冇得舒舒服服自動當選。
其實，喺多間大專院校發起退聯後，學聯嘅存在價值同影響力已經大打折扣，雖然去年學聯代表一直扮演佔領行動領導者，又負責同政府對話，但政治光環愈大，內部爭拗同內訌亦愈厲害，依家新領導層嘅選舉又有暗湧，最弊嘅係仲有幾間院校排往隊發起公投要退聯，麻煩一個接一個，睇怕新一任學聯秘書長嘅其中一個工作，就係要幫「學聯」諗定個新名嘞。
