西環：士多阻街 無懼檢控
「由朝到晚都有十幾箱樽裝飲品同水果放晒出嚟，得番半條路可以行！如果碌咗啲出街戟親人就危險啦！」西環居民何小姐指，北街有士多常於店外行人路擺放貨物，包括樽裝飲料及水果，疑因該段行人路毗鄰食肆及住宅，加上店外行人往來如鯽，對街道造成嚴重阻塞，要求部門盡快對違例人士採取執法行動。
西環北街有士多經常於店外行人路擺放貨物，被指影響道路暢通，易對途人構成危險。
食物環境衞生署發言人表示，接獲轉介後曾派員巡查，發現投訴屬實，已檢控有關店舖負責人。
不過，何小姐近日再行經上址，發現店舖阻街問題仍未改善，要求食環署加強巡邏並考慮提高罰款額，「依家經過見佢仲有擺貨出街，既然做咗檢控都冇乜用，希望食環署再巡多啲，同埋提高罰款額啦！」
