咸仔拍阿諾棟篤笑仲爆

F1開鑼戰冇驚喜！一如所料，平治「雙雄」昨於澳洲站起步後即齊齊飆上火星，包Q毫無懸念，衞冕總冠軍咸美頓亦憑「零失誤」表現食住洛辛保「攞頭彩」，悶到暈！最「爆」一幕反而是「黑帝」在頒獎台上與客串做採訪主持的荷里活巨星阿諾舒華辛力加，同聲喊出《未來戰士》經典名句「I'll be back」，搞笑又不失霸氣！

「黑帝」戴晒粗金鏈影威水相，型爆！（Getty Images圖片）

維度爾（右）有得企櫈仔都當自己贏咗。（美聯社圖片）

咸美頓衞冕路有個好開始。（法新社圖片）

車隊榜Top5

等足4個月後F1重燃戰火，吸引不少明星親赴墨爾本觀戰，除阿諾舒華辛力加外，還有奧斯卡影后查理絲花朗，星光、艷光四射。不過由於瑪魯西亞車隊No show、威廉士保迪斯因傷退賽、麥拿侖麥紐遜戰車引擎「冧偈」，今站只得16名車手出賽，略見「冷清」。

平治包Q維度爾第3當贏咗

甫開賽，咸美頓、洛辛保、馬沙及維度爾順利搶出，蓮花的馬當拿度卻於二號彎剷上圍欄，未夠半個圈已引發安全車出動。3圈後賽事重開，平治雙雄「眨眼唔見咗」，其他車手只好一邊「食塵」一邊為季軍奮力而戰。最終排頭位的「咸仔」以1.36秒力壓隊友洛辛保，贏得生涯第34個分站冠軍，維度爾拚得季席，轉投法拉利首仗即有櫈仔企，開心到飛起！

嗌《未來戰士》經典名句

過去8站（跨季）贏足7場，「黑帝」站上頒獎台勁風騷，見到揸咪訪問自己的竟然是「未來戰士」更加High：「跟你站在一起的感覺太棒，我原以為你應該高一些。」阿諾舒華辛力加回應：「我今日沒穿高跟鞋。」兩大主角先來一場「棟篤笑」。聲稱好崇拜「阿諾」的咸美頓，被問及奪冠感受時都是交出「感覺美妙，不可思議」的標準答案，直至採訪結束，他應「未來戰士」邀請齊喊「I'll be back」，再次惹來全場歡笑聲。

至於去季僅4次賽入三甲的維度爾，首次為「紅魔」上陣已奪季軍，久違頒獎台的他興奮高呼：「就像贏了冠軍一樣！不過想擊敗平治，還須付出很大努力。」第二站本月29日轉戰馬來西亞。