正義青年好陽光 花香自然有人讚
佔領後遺症沒完沒了，鳩嗚、光復行動成為例牌動作，搞到香港烏煙瘴氣，七國咁亂，其中唔少係年輕人，真係睇見都眼冤。不過咁，呢啲一味搞搞震嘅廢青始終只係少數，香港地仲有好多關心社會嘅陽光青少年。
呢，有團體最近搞咗個「關懷行動創作比賽」，鼓勵學生反思同以具體行動回應貧窮基層需要，得獎嘅活動唔單止有創意，仲好可行添。例如有中一學生眼見基層同學居住環境擠迫，發起「一塊錢行動」，希望全港學生一人捐一蚊畀政府起多啲公屋；又例如有嚟自中產家庭嘅中五學生，探訪劏房戶後深深感受到貧窮人士嘅困境，提議全港中學協辦一年一度嘅「探訪蝸居日」，等學生可以親身體會基層嘅生活苦況喎。
睇到咁多青少年咁陽光，咁正氣，相信好多市民同太一叮一樣，既高興又感慨：同一片天空下，同樣係年輕人，點解有啲淨係識嘈喧巴閉，有破壞冇建設；有啲就坐言起行，腳踏實地改變社會？唔通大家嘅DNA係唔同嘅？
嗱，DNA呢家嘢要驗過至知，但正氣青年同正氣傳媒相得益彰，就珍珠都冇咁真嘞。上述團體仲舉辦中學生貧窮要聞選舉，覆蓋二十二間中學共五千多名學生，結果本報舊年三月「二十萬港人蝸居籠屋」嘅報道，高票當選第一名。係人都知，東方報業集團一向為民喉舌，特別係長期以嚟為基層弱勢發聲，更加係有口皆碑。中學生慧眼識珠，有關報道擊敗芸芸對手脫穎而出，一啲都唔出奇吖。
所以話啫，賣花唔使讚花香，花香自然有人讚喇。《東方日報》執報界牛耳，連續幾十年全港銷量第一，本報亦長期穩佔第三位，證明讀者嘅眼睛係雪亮嘅。大家有眼見，我哋除咗為基層弱勢發聲，仲一直企喺揭弊最前線，上至貪曾「貪遍省港澳」、貪湯「茅台換政協」嘅世紀醜聞，下至民航處大花筒亂揈公帑，興建豪華總部，都係我哋率先踢爆。最重要嘅係，我哋敢於同淫媒政棍、漢奸餘孽一類反中亂港勢力針鋒相對，直頭係濁世裏面嘅一股清流，有乜法子唔受讀者歡迎吖。
香港需要正義傳媒，更需要正義年輕人。對於各位讀者嘅支持同掌聲，我哋絕對唔會自滿，定當繼續努力拚搏，發揮第四權嘅功能，為社會把脈，為市民出聲！
