SUN焦點：酸比甜更傷牙食完忌即刷

「酸比甜更傷害牙齒，甜需要有細菌同一段時間之後先會開始破壞牙齒表面，而酸係會即時傷害。」香港牙醫學會會長梁世民指出，若長期進食酸性食物或飲品而導致口腔長期「保酸」，唾液將無足夠時間鈣化珐琅質，令珐琅質加速損害，導致珐琅質變薄，牙齒可能會「崩」、蛀牙及出現敏感徵狀，他表示有病人曾因此要杜牙根。

「好多人以為食完酸嘢要即刻刷牙，但咁樣反而會刷損啲珐琅質。」梁警告指，酸性令牙齒表面變軟，立刻刷牙會令珐琅質受損，同樣，一邊進食一邊飲酸性飲品，亦會「傷牙」。故他建議進食酸性食品或飲品後應多飲水，中和口腔酸性，並在半小時至四十五分鐘後才刷牙。