城中鏡：陳恒鑌撐美食車 墾丁嘗火燄咖啡
財爺鬍鬚曾喺上個月公布新一份財政預算案，其中一項建議係倣效外國引入美食車，隨即成為城中熱話，但係究竟幾時先實行到，咁就要睇當局有幾積極去進行研究，同埋有冇決心去落實嘞！
陳恒鑌喺墾丁幫襯美食車，歎當地有名嘅火燄咖啡。（受訪者提供）
立法會議員Ben陳恒鑌早前放假，同屋企人去台灣墾丁旅行，見到有架美食車賣緊當地有名嘅火燄咖啡，即興致勃勃幫襯，點知同美食車老闆傾開至知，呢架美食車原來係非法。
阿Ben話嗰位小販知道香港考慮引入美食車，覺得好羨慕，皆因台灣仍未有美食車發牌制度，檔主只能偷偷地做生意，若被捉到就要罰錢。阿Ben力撐引入美食車，認為只需解決交通同衞生問題，美食車勢必吸引唔少市民同旅客光顧，分分鐘會成為另類旅遊景點。
