城中鏡：請飲嘢氹除「罩」陳正欣妙計化劫
喺日前尖沙咀發生嘅開槍打劫錶行案件震驚業界，但近排流感肆虐，唔少市民都戴住口罩出入人多地方，商戶想唔接待戴口罩嘅客人都有難度。尋日喺沙田馬場見到經營名錶生意嘅百利建集團董事總經理Daniel陳正欣，佢就有妙計氹客人除下「神秘面紗」，如果對方堅持唔肯除，咁就要留意係咪有可疑喇！
劉展灝對今次開槍打劫覺得好震驚。
陳正欣有好計氹客人除低口罩。
簡炳墀（左）一入馬場即被馬迷索取簽名。
劉展灝：最緊要隨機應變
Daniel話開門做生意，提供貼心嘅服務好重要，所以店員如果覺得戴住口罩、遮咗個樣嘅客人有古怪，可以關心吓對方係咪唔舒服，請佢飲杯暖水、熱茶甚至蜜糖水，總之諗盡辦法氹客人除低口罩。咁有冇諗過聘用持槍警衞加強保安？Daniel認為行唔通，事關咁做會令客人感覺緊張，萬一真係遇到持槍匪徒，若果警衞同匪徒駁火，亦只會導致更多人命傷亡咁話。
做鐘錶生意嘅香港工業總會主席劉展灝就話，今次事件確係令人震撼，因為過往珠寶鐘錶行業最多係遇到騙徒，用假信用卡、用假貨偷龍轉鳳或者偷嘢等，根本估唔到竟然會攞支槍出嚟咁大鑊。不過，佢認為鐘錶業界唔使特別緊張，事關就算便利店，都一樣有機會發生，最緊要係店員識得隨機應變。
好耐冇喺公開場合露面嘅香港冠軍練馬師「食力簡」簡炳墀亦有入馬場，佢戴住黑超，甫入馬場，即被一班馬迷圍住攞簽名、影合照。因賄選而入獄幾個月嘅食力簡感慨話，錢真係會累人，佢依家過着退休生活，得閒約朋友食吓飯，已經好開心。
