區議會選舉同立法會選舉分別喺今年底同明年舉行，唔少有意進身政界嘅人都籌謀緊參選，曾經講過話唔參選嘅愛港之聲主席高達斌，尋日就一改口風，話唔排除參選，仲話愛港之聲積極尋求緊建制力量支持添！

高達斌

高達斌趁機宣傳愛港之聲即將舉行嘅新春晚宴。佢話當晚會喺紅磡一間酒樓擺三十圍，問到佢有冇邀請中聯辦或者政府官員出席，佢就賣關子話唔講住，大家到時去到就知喎。

愛港之聲近年經常就社會或政治議題發聲，高達斌話作為民間組織，都係時候有佢嘅位置。所以佢哋依家積極同建制派有分量嘅人打交道，「睇到今日嘅環境，冇建制力量好難支持落去」，但就否認咁做係為區議會鋪路。但係講講吓，佢又承認愛港之聲有人想參選，佢自己亦打晒開口牌話有意參加，「Day one時係講過唔參選，但見到今日嘅環境，諗法就改變咗。」

第一手消息請下載on.cc東網iPhone/iPad/Android/Windows Phone Apps