政壇：老嫩鴿戰一觸即發
白鴿黨前主席兼立法會議員「AV仁」何俊仁，早前宣布計劃喺立法會否決政改方案後辭職發動公投。雖然白鴿黨去年底換屆後，唔少激進乳鴿殺入中委，佢哋都傾向支持AV仁嘅辭職公投大計，但係白鴿黨內部對此仍然存在好大分歧，佢哋嘅籌款委員會主席、資深老鴿「肥仔明」李華明更明言反對AV仁辭職發動公投，會喺黨內進行游說工作。不過，有乳鴿就話AV仁拋出辭職公投方案後，已經係「騎虎難下」、勢在必行。睇嚟白鴿黨內嘅老鴿同乳鴿將會展開一場大鬥法。
白鴿黨內對AV仁辭職發動公投的建議存有分歧，雖然一班乳鴿對此興致勃勃，但有老鴿分析，今次政改關乎特首人選，北京唔會「有彎轉」，批評黨內有人以為搞辭職公投，就可以迫使北京對政改讓步，真係太天真。日前作為其中一位資深老鴿嘅肥仔明更開腔反對搞辭職公投，又話如果黨內會員大會通過辭職公投嘅話，佢都唔識點樣再幫白鴿黨去籌款，暗示唔會再做籌委會主席，甚有挑機意味。
尹兆堅料AV仁得多數支持
不過，最近終於成功上位嘅白鴿黨副主席尹兆堅就估計，辭職公投建議最終都會喺會員大會通過，而且支持同反對嘅比例仲會係七比三添！佢分析，換屆之後三分之二嘅中委都係「後生仔」，佢哋都傾向支持辭職公投，建議要得到中委會支持應該冇問題，加上外界對白鴿黨發動辭職公投已有期望，相信黨內嘅資深會員都會明白，講咗唔做分分鐘畀人鬧得仲犀利，甚至同再次「轉軚」無異咁話。
白鴿黨將喺下個月至五月初就AV仁辭職發動公投建議開會員大會，進行表決，乳鴿能否如願，到時自有分曉。
