高鐵超支無底洞 最怕淪為大白象

呢，港府尋日向立法會匯報高鐵工程進展，運輸及房屋局副局長邱誠武話喎，整體工程已完成近六成四，同經修訂嘅進度時間表差唔多；工程費用最新估算係七百一十五億元，超支約六十五億元。

不過咁，負責工程嘅港鐵就冇港產官僚咁樂觀喇，話就話工程已完成六成幾，挖咗超過四分三隧道，但仲有幾個關鍵工程合約「需要關注」，包括西九龍總站北面、大江埔至謝屋村隧道，以及皇崗至米埔隧道等。

好明顯，所謂「需要關注」，即係冇信心囉。正如有立法會議員質疑，西九龍總站混凝土工序只完成四成一，按照目前進度，剩低嘅工程三年內最多只可以完成百分之七十四咋。試諗吓，總站工程未能如期完成，一七年底又點樣如期通車吖？

話時話，影響工程進度除咗技術等因素，政治因素同樣重要，甚至影響仲大。家陣香港爭拗不絕，反對派為咗癱瘓政府施政，發起所謂全面不合作運動，為反對而反對，除咗拉布流會，幾乎冇做過一件正經事，令經濟和民生議題嚴重受阻，高鐵超支撥款需要向立法會申請，你話會唔會受到阻滯吖？如果反對派唔肯放行，咁又點算呢？

港鐵獨立董事委員會主席馬時亨早前警告，高鐵有七成機會再超支，埋單計數可能遠遠唔止六十五億元。即係話，究竟超支幾多，當局自己都心中無數，只能夠望天打卦嘅咋。

仲有吖，有立法會議員再次問到「一地兩檢」嘅問題，運房局含糊其辭，只係話會爭取通車前落實安排喎。其實明眼人都睇得出，當局根本冇信心搞得掂。係人都知，香港愈來愈政治化，中港矛盾日益尖銳，「一地兩檢」涉及兩地執法，話題敏感，隨時成為新火頭，成唔成事根本冇人知。一旦「一地兩檢」告吹，高鐵同直通車相差無幾咋，你話係咪嘥氣吖。

講開又講吖，高鐵本來已經係全球最貴嘅鐵路，家陣成本仲要繼續飆升，誇張啲講句，用黃金鋪設都係咁上下咋，唔怪得有人擔心淪為大白象工程喇。所以話，港產官僚食嘢唔做嘢，做嘢打爛嘢，納稅人真係多得佢哋唔少，叮！