政壇：搞搞政：中西區白鴿黨 飽受狙擊勢危
今年區議會選戰將係政圈焦點，民主黨（白鴿黨）今屆派逾百人出戰，但形勢卻唔多樂觀，繼早年痛失葵青、屯門等根據地後，據知中西區呢個最後堡壘都有被動搖危機，其一係因部分老鴿退下火線，乳鴿未夠火候，另一致命原因就係委任制取消，委員會要搶位，硬撼白鴿就少不免，而近排頻頻上演「激」戰嘅中西區區議員許智峯就更加係搶位焦點之一，內憂外患下，白鴿好頭痕。
設計圖片及對白
許智峯未獲溫和派撐腰
以專業中產選民為主嘅中西區過去一直係白鴿黨根據地，但建制派過去靠力捧無黨派「獨立」人士出選，又搵第二梯隊死守地區深耕博反彈，加上委任議員多屬「自己友」，已令白鴿受壓，而區議會下屆起取消委任制，委任議員如文志華及吳少強都未知會否搵位出選，但就力撐區內靚女牙醫劉尉欣硬撼乳鴿許智峯；而同屬委任議員嘅區議會主席葉永成更擬取代林懷榮出戰寶翠選區，以延續議員生涯。
早前有傳激進嘅許智峯，同黨內走溫和路線嘅老鴿唔多咬弦，老鴿亦唔肯隨傳隨到為四處佔領政府部門嘅許智峯撐腰，許智峯危危乎之餘，其他白鴿席位亦有壓力，事關激進泛民勢力亦可能狙擊白鴿黨，處處狙擊聲，白鴿呢場保位戰實在好難打。
