政壇：黃家和坐正品牌局主席
中華廠商聯合會（廠商會）新班子已在元旦正式上任，一班會董早前趁做咗三年會長的施榮懷（Irons）主持任內最後一次會董會後，拉大隊舉行歡送晚宴。現場好熱鬧，好多人同廠商會常務會董黃家和（Simon）道賀，細問之下，原來Simon將接替陳淑玲（Shirley）出任品牌發展局主席，難怪個個都戥佢開心。
陳淑玲（右）將交棒畀黃家和，繼續發掘香港品牌故事。
會董們特別訂製蛋糕送別施榮懷。
施榮懷（右）將交棒畀李秀恒。
Simon笑笑口話，任期將於今年四月生效，但呢幾個月都冇得偷懶，事關要開始搵班底。Shirley就話，Simon做咗品牌局副主席多年，喺商界歷練又極豐富，想搵業界叻人埋班梗係難唔到佢喇！咁Shirley卸任後多咗好多時間，最想做乜呢？唔通係佢啱啱獲政府委任的復康會成員工作？Shirley笑笑口表示，冇錯，因為佢係首次加入，所以會畀多啲心機，為殘疾及復康人士做事。
晚宴男主角Irons就話，佢加入廠商會共十三年，覺得依依不捨，卸任後將畀多啲時間睇番自己盤生意，努力搵真銀咁話。一眾出席者好有心，特別訂製一個「施榮懷」蛋糕贈興。
