政壇：鬍鬚曾借預算案報復？
每年年底，財政司司長曾俊華（鬍鬚曾）都會去立法會財經事務委員會簡介香港經濟狀況，順便聽吓議員對《財政預算案》嘅意見。不過，上年就有啲例外，事關七十幾日嘅佔領行動一度癱瘓政府運作，就連通往立法會嘅添美道都被堵塞，搞到鬍鬚曾去立法會嘅安排都被迫取消。委員會最近打算補開會邀請鬍鬚曾出席會議，點知鬍鬚曾回覆話，要講嘅已經向公眾講晒，呢個時候諮詢已成效不大，鬍鬚曾擺出一副大拋檸檬嘅款，唔通心中有氣？
設計圖片及對白
話說立會財經事務委員會主席陳健波早就去信鬍鬚曾，問吓有無需要重開財經事務委員會，鬍鬚曾早幾日回信話，雖然當日嘅財經事務委員會取消咗，但佢已經喺同日開番記者會，算係及時向市民發布咗關於香港經濟前景嘅數據。佢仲話，《施政報告》同《財政預算案》都就嚟公布，再次就預算案舉行諮詢未必有特別成效。不過，明言開會冇用之後，佢又冇閂晒門，話如果議員想開會佢都樂意配合嘅，喺便利雙方嘅時間向議員再做簡報喎。睇怕睇過呢封信嘅人都知，鬍鬚曾想再開會嘅意欲好低囉。
拒陪泛民做騷
其實，經濟數據喺記者會上公布咗，原本嘅會議只不過係政府想聽吓議員對預算案嘅意見，去年十二月中，財爺同財經事務及庫務局局長陳家強已經約咗成班建制派議員食飯，聽咗二十幾個議員對來年預算案嘅期望。至於泛民主派，佢哋一早就已經話要採取不合作運動，杯葛施政報告諮詢，相信一齊諮詢嘅財政預算案，佢哋都唔會有咩想講，只係向財爺交個建議綱領就算數。
再講吖，開親會泛民議員都好似「開騷」咁，唔係大鬧特鬧，就係乜都扯嚟講，發言分分鐘撐咗去大西洋。鬍鬚曾無意陪做騷，都無可厚非噃。而且，泛民有份搞佔領行動，算係搞到開唔成會嘅元兇之一，你做初一，唔通唔畀人哋有「不合作」咩？
