搞事政客犯眾怒 搬起石頭砸己腳
最後一個佔領區銅鑼灣清埋，拖咗兩個多月嘅佔領鬧劇收工大吉，又到埋單計數嘅時候嘞。即係咁，以淫賤黎為首嘅一眾幕後黑手落鑊伏法，可能仲要等一段時間，但係民意懲罰嘅現眼報，話咁快就到嘞。
嗱，有民調機構尋日為喺立法會有議席嘅十五個政團派成績表，結果除咗排榜首嘅民建聯同第二嘅新民黨，得分叫做輕輕升咗啲之外，其餘黨派全部好似食咗瀉藥咁，特別係包括工黨同教協等嘅泛民政團，支持度更加係全線插水，簡直係慘不忍睹。
呢啲咪叫失道寡助囉，大家有眼見，佔領搞咗咁耐，普選爭唔到，反而搞到社會撕裂分化，經濟嚴重受損，法治一鋪打殘，直頭禍港殃民，香港人真係多得呢班搞事政客唔少。所以話啫，反對派撐佔領等於與民為敵，支持度插水，同搬石頭砸自己腳冇咩分別。
最好笑嘅係，當初班泛民一個二個瞓身支持佔領，仲聲稱乜鬼嘢「愛與和平」添，點知後來佔街佔到烏煙瘴氣，仲發展到暴力衝擊，市民罵聲四起，佢哋見勢色唔對，第一時間飛身切割，又譴責又出聲明，懶係大義凜然咁款。好嘞，到金鐘清場嗰日，佢哋又撲番出嚟做場被捕爛騷抽水，扮晒「民主英雄」，尤其係博拉嗰陣，佢哋將淫賤黎圍喺核心，呢幅「群丑拱衞」圖，證明班政客爭民主係假，收咗黑金為淫賤黎打工就真。
正如有人話齋，佔領之亂就好似照妖鏡咁，牛鬼蛇神全部現形，而最樣衰嗰件，肯定非工黨主席李卓人莫屬，佢收淫賤黎黑金「袋住先」唔在講，仲收埋美國佬錢，話運動冇外部勢力插手喎，呃鬼食豆腐咩。仲有吖，李卓人口口聲聲為工人謀福利，查實正正係佔領行動搞衰香港經濟，打工仔出年加薪凍過水，今次調查「工賊黨」支持度跌到應一應，證明市民眼睛係雪亮嘅。
既然講開壞人壞事，唔爭在講埋教協。佔領一役，有教師教唆學生冒留案底嘅風險霸佔街道，「佔中三恥」之一嘅港大法律系副教授戴耀廷揚言會有暴力抗爭，教協更一度鼓吹罷工罷課添。有人話濫權嘅警察係「黑警」，咁唔知誤人子弟、毀人前程嘅教師係咪應該叫「黑師」呢可？
始終都係嗰句：票債票償，如果大家想香港好，麻煩下次選舉將呢班反對派政棍掃入歷史垃圾堆，睇吓佢哋仲點樣為害人間，叮！
