城中鏡：馮程淑儀為滅火筒虛驚
持續逾兩個半月嘅佔領行動尋日正式落幕，回顧過去一段時間，有劍拔弩張情景，亦有鮮為人知嘅趣事。有政府中人透露，大約喺半個月前示威人士衝出龍和道爆發猛烈衝突後，康樂及文化事務署發現有示威人士「老爆」添馬公園附近其中一個儲物室，偷走入面部分物品，結果惹來民政事務局常任秘書長Betty馮程淑儀虛驚一場。
馮程淑儀擔心示威者拎住嘅滅火筒係政府物品，結果虛驚一場。（資料圖片）
由於局方中人唔知儲物室入面儲存咗啲乜，所以當示威人士攞住個滅火筒同警方對峙時，據聞Betty就周圍問人個滅火筒係咪屬於政府物品，應該係擔心萬一個滅火筒屬康文署擁有，咁就麻煩喇。不過，佢哋調查後發現儲物室內原來只係擺放磚頭，先鬆咗一口氣。都係嘅，磚頭係無色認嘅，就算被示威者當做武器，都唔知關邊個事喇！
不過，由於有佔領人士曾經闖入政府總部東翼廣場，各政策局中人擔心如果有人成功非法闖入政總大樓，分分鐘會去到各政策局辦公樓層，萬一睇到啲機密文件，到時真係唔知點算。
正因為咁，各政策局高官喺離開寫字樓前都會確保機密文件鎖好，又會鎖埋房門以防萬一，就算爆門都有一定難度。
