城中鏡：霍震霆呻孫仔咁細要上堂
港協暨奧委會會長霍震霆尋日為保良局慈善高爾夫球賽主持開球禮，球技生疏嘅佢第四桿先打得出。問到平日有冇打高球習慣？佢笑說：「睇我頭先就知麻麻哋！」
霍震霆自認打高球麻麻哋。
問到希望孫仔將來「地上最強」抑或「水上最強」？佢指孫仔只有一歲多，繼而呻兒子霍啟剛同新抱郭晶晶對孫仔嚴謹，佢話：「得一歲幾，依家嘅家長好怪，咁細都要畀佢上堂。雖然香港競爭大，但都要多啲參與運動。慢慢等佢自己選擇玩乜嘢運動，高爾夫球都幾好。」咁孫仔識叫「爺爺」未？佢話：「識叫爹哋、媽咪，日日同佢講『爺爺』，都冇反應。」
