城中鏡：佔領畫句號 商界齊睇好
佔領行動尋日正式畫上句號，咁啱得咁蹺，為激勵年輕人而創立嘅善德基金會（下稱「基金」）亦喺尋日舉行創會就職禮，出任基金創會主席嘅仁濟醫院前主席董吳玲玲笑稱尋日確係吉日，籌備時冇諗到時間咁巧合。擔任永遠名譽會長嘅太子珠寶鐘錶主席Jimmy鄧鉅明冇被佔領嚇怕，決定明年喺旺角開多兩間分店，為香港前景投下信心一票。
藍國慶（左起）、陳國超、洪少陵同湯修齊四位常務副主席齊為善德基金會出錢出力。
鄧鉅明（右）同太太鄧宣宏雁對香港前景充滿信心。
董吳玲玲（中）擔旗搞善德基金會，仁濟醫院主席蘇陳偉香（右）同保良局前主席顏寶鈴（左）齊捧場。
藍國慶盼青年企高望遠
善德基金籌備逾半年，主要係由曾任各大慈善團體要職及商界領袖組成，其中又以大本營喺新界區嘅善團為主，包括博愛醫院前主席藍國慶同湯修齊、仁濟醫院前主席李文斌等人都出任常務副主席。董太話香港係個福地，大家應該珍惜。基金將透過各種有創意嘅活動，教識年輕一代積極做人、學識承擔，最緊要互相支持、尊重及包容。
藍國慶就話將以破格、具創意嘅方式提高年輕人對社會嘅參與，例如鼓勵研發關懷社群嘅科技產品或手機應用程式。佢強調最終產品是否可用唔重要，讓年輕人透過參與去易位思考才是重點。明年基金將舉行全港性大型遠足百萬行，希望年輕人企高啲、望遠啲。
講到全部佔領區已還路於民，受佔領影響而生意大跌嘅Jimmy都好開心，但啱啱清晒場，相信內地客趕唔切安排來港消費，唔敢寄望聖誕假期旺季生意會有顯著上升。不過，佢好樂觀話將於明年上半年開多兩間分店，而且都喺曾經被佔領嘅旺角區，希望社會各界積極向前看。
