大搜查：「菲林味」濃老鏡熱炒
傳統菲林機鏡頭被打殘？未必。十多年前數碼相機的出現，確曾一度嚴重打擊菲林機銷情，但近年又愈來愈多人回歸菲林機和手動鏡頭懷抱，專售傳統相機的老舖生意重拾升軌。
Leica黑漆版M2，八十年代售2.5萬元，如今拍賣價值21.24萬元。
第一代Summilux-M 1.4/35mm黑色鋼嘴鏡頭，今年拍賣值82.6萬元。
回想起那些年「捱打」的日子，相機界老行尊陳烘直指當年並無對策，當時生意額下跌三成。不過數碼相機推出後五年（約○三年以後），生意開始回升。他形容菲林機與數碼相機的拍攝效果，是兩種截然不同的味道，數碼相機「乜都設定好，瞇埋眼都到」，當「玩到咁上下，覺得無乜意思」，部分用家便選擇重拾「自己控制嘅相機」；再加上日本吹起「新機搭舊鏡」潮流，只要加上接環便可把舊鏡頭裝上數碼相機，「影出嚟嘅效果有些少菲林feel」，一三年底推出的Nikon DF更以支援手動舊鏡頭作賣點。
菲林機不單打不死，揀得有眼光，絕對是投資。數碼相機「唔襟擺」，相反，優質的菲林機和手動鏡頭則愈舊愈值錢。想入手投資，除了留意年份，陳烘再三強調「一定要手動，凡係用電就唔值錢。」他指出，五十至七十年代的菲林手動機和手動鏡頭均有價有市，至於七十至八十年代的手動鏡頭是「真真正正嘅玻璃」，目前買入價仍便宜，將來一定升值，Canon及Nikon等人氣品牌都入得過。
Leica菲林機21萬成交
Leica近年不時推出貴價限量版，如索價逾10.8萬元人民幣的「M7辛亥革命限定版」及19.9萬元人民幣的「MP黃金特別版」等，陳烘本人偏好收藏早期Leica機，而他的珍藏升值力驚人。以他在八十年代用2.5萬元入手的Leica黑漆版M2為例，同款相機連鏡頭在今年仕宏春季拍賣會上以21.24萬元成交，升幅逾八倍。而他在八十年代以2.6萬元購入的第一代Summilux-M 1.4/35mm黑色鋼嘴鏡頭，同款鏡頭在同一拍賣會上以82.6萬元成交，至今升值逾三十一倍。
