政壇：白鴿換屆騷兩度甩轆
白鴿黨前日舉行換屆選舉，由劉慧卿連任揸莊擔任主席，新氣象唔太多，相反就甩轆連連。話說該黨喺社交網站專頁，當日同步直擊閉門選舉情況，但一有新訊息，就惹來唔少網民冷嘲熱諷，部分更講埋粗口添，版主就向呢啲人發出警告，要求對方說明其言論理據，部分再犯者更被停版冇得留言。
一班被禁網民梗係唔妥版主啦，其他網民就跟住粗口留言，叫版主封鎖晒佢哋喎，部分更反諷係白鴿黨發言無理，要停止其發言權。
最終該黨創意媒體部尋日要發出道歉聲明，死死地氣話版主處理留言做法不當，向網民致歉，聲言會深刻檢討，並解除被鎖用戶。
另外，同白鴿黨有好多牙齒印嘅新民主同盟透露，前日卿姐打畀三年前轉投新同盟嘅新執委陳惠達，指名道姓向對方拉票。新同盟議員范國威寸白鴿黨黨員資料管理混亂，「令人側目」，仲保留咗卿姐電話留言添。卿姐尋日解釋，因為要打太多電話而搞錯，但就話對方今年五月先至退黨喎。范國威就話肯定陳惠達係一一年退黨，睇嚟兩黨又有一番爭拗喇！
