政壇：袋巾傑溫和歲月曝光
歷時兩個多月嘅佔領行動尋日終告結束，唔少人都預期社會將進一步趨向激進，尋日城大舉辦政改論壇，獨立建制派議員Paul謝偉俊就「自揭瘡疤」，講番以前爭取律師可以賣廣告，採用「價值破壞」方法去告律師會，又着泳褲抗議，因為過激搞到焦頭爛額。但佢反指曾任大律師公會主席嘅公文袋黨魁「袋巾傑」梁家傑，當年被京官視為溫和派，值得統戰，都算係「三十年河東、三十年河西」喇！
設計圖片及對白
捉住隻手嗌「家傑」
阿Paul話當年袋巾傑係法律界「建制派」，獲邀到深圳同京官會面，當時京官仲握住佢隻手叫「家傑」，親切到不得了。佢話想用呢個反面例子，說明唔應該好似隻盲頭烏蠅、死牛一便頸。佢又認為中央作用力大，反作用力仲大。袋巾傑就反駁，話以為阿Paul想話只要堅持抗爭，終會成功添！一個挑機，另一個死撐，又係大噴口水花。
不過，勢估唔到另一嘉賓、新民黨東區區議員Marcus謝子祺發言仲「倒米」，叫人有回鄉證嘅話，不妨加入建仔。點解咁講，原來佢話最有創意嘅不合作運動，就係進入政府同建制派從內部改變。佢仲話，如果建仔議員有十幾二十個「曾鈺成」，質素肯定唔同晒，建議學聯諗諗喎。
Marcus又話為咗長期目標，短期放棄某啲非核心原則都可以。不過，身為城大校友嘅佢，就畀好多觀眾柴台。學聯秘書長周永康話呢個逆向思維「非常有趣」，話想像唔到喎。其實論壇本來仲邀請咗全國政協常委陳永棋，但聽講佢尋日朝早話，唔想有咁多記者在場，搞到好似辯論，寧願私底下見班學生。
