鳩嗚惡過蝗蟲 佔領神憎鬼厭
佔中三子自首，學聯有意褪軚，學民絕食騷又冇乜人吼，加上高院啱啱駁回要求喺金鐘佔領區暫緩執行禁制令嘅上訴，睇怕佔領行動氣數已盡，就快收皮。如果你真係咁諗，就大錯特錯嘞。
即係咁，你有張良計，佢有過牆梯。亂港勢力唔會就咁收手嘅，霸佔街道安營紮寨唔得吖嘛，就玩「野貓式佔領」；石屎路障被清除吖嘛，就玩流動人肉路障。嗱，旺角「失守」之後，部分滋事分子近日喺區內發起所謂「鳩嗚」（購物）嘅變相佔領行動，幫襯係假，搞事就真，商戶備受滋擾，警察疲於奔命。
尋日周五，旺角商戶又神經高度緊張嘞，驚呢班「鳩嗚」兵團再次出動，有商戶為免被殃及，情願賺少啲，一見班友蒲頭即時拉閘。講真，舖頭閂得切梗係掂喇，萬一手慢閂唔切，後果會好大鑊o架。
嗱，有辦你睇。前幾日之嘛，西洋菜南街一間服裝店外有班「鳩嗚」人士聚集，店員見唔對路，驚有人鬧事打算落閘，點知畀人阻止，有人藉口揀衫喺店內流連，有人出言不遜挑釁店員，最後要警方到場調停至平息，事後有人竟揚言要「日日行入去試褲」，擺明要繼續玩嘢啦。
有冇更惡啲吖！商家打開門做生意，本來係來者不拒，買嘢嘅歡迎，齋睇都得，但搞嘢一定唔得，阻人收舖更加係離晒大譜。呢班人開口民主，閉口普選，但民主係為咗乜，咪就係改善民生囉，咪就係尊重別人嘅權利囉，咪就係社會更加和諧囉，但係將個人意志強加於人，阻人搵食，咁就叫爭取民主咩？再講吖，舖頭係人哋真金白銀租番嚟，做唔做你生意，幾時收舖，係人哋嘅自由，憑乜阻止？
一句講晒，呢班人嘅所作所為，同追求民主根本係背道而馳，係藉民主之名行擾民之實。唔好話建制派立法會議員批評呢種做法明顯對店舖構成滋擾，有機會觸犯民事同刑事法，連反對派議員都唔敢包庇，話做法唔恰當。你話嘞，班鳩嗚分子係咪神憎鬼厭吖？
有人成日話內地客係蝗蟲，其實呢啲無喇喇騷擾商舖嘅行為，先至係真正嘅蝗蟲。佔領行動本來針對嘅係人大決定，搞埋香港普羅市民同商戶根本就捉錯用神，九唔搭八。計太一叮話齋，要「鳩嗚」唔該過深圳羅湖橋，嫌唔過癮可以直接踩上北京添，至怕班鬥士唔夠膽咋，叮！
