潮語所謂「人粉」其實有兩個意思：第一個意思係政黨人民力量嘅「粉絲」，統稱為「人粉」，佢哋有部分經常活躍於網上討論區或社交網站，對敵對派系進行文字攻擊。「人粉」另一個意思就同政治無關，只係用嚟形容一啲人連「人渣」都不如，只係一堆比渣滓更廢嘅「粉末」。因為「人渣」都有可能用作肥田料，效果同牛糞一樣。但「人粉」係一啲絕對無用嘅粉末，仲有可能造成空氣污染。所以，依家鬧人係「人渣」都算畀面，痛罵一啲比「人渣」更差的人就要用「人粉」去形容。

最近氣溫驟降，如果要瞓街再加上絕食，成件事就係飢寒交迫，真係苦過弟弟。偏偏香港地就有幾個年輕人，為咗香港嘅未來，為咗民主真普選，天寒地凍走去絕食，以圖以自己弱不禁風嘅身體去抗議。講真，雖然我覺得佔領街頭六十幾日，政府依然無視市民訴求，佢班膠官又點會理你絕食行動？但將心比己，黃之鋒為政改絕食，又真係令部分市民痛心，有一種「我見猶憐」之感。加上睇埋之鋒寫畀母親嘅公開信，同埋一封之鋒母親寫嘅公開信之後，作為兩子之父嘅我，都感到相當唏噓。點解當權者要逼到香港人如此？有啲冷血嘅人士，仲大罵佢哋係自己攞嚟，仲咒罵黃之鋒最好絕食絕死佢。更多嘅係，對佢哋嘅絕食不聞不問，當睇唔到！呢啲真係「人粉」嘅行為！

咁你可能會問，邊種人先稱得上「人粉」？立法會某啲水平極低嘅所謂議員，佢哋係「人粉」就唔使多講，但係有啲所謂「民主派」嘅議員，好似湯渣之流，竟然話用鮮血用汗水爭取民主嘅香港年輕人係嬌生慣養，呢啲打着民主旗號撈選票但又從不爭取民主嘅人，咪就係「人粉」咯！明未？

第一手消息請下載on.cc東網iPhone/iPad/Android/Windows Phone Apps