政壇：搞搞政：「毛」「范」被寸爆 同着一條港獨褲
近年中港矛盾激化，有心人推銷港人優先主義係其中一個禍源，泛民嘅范國威同毛孟靜兩人搞咗個香港本土嘅組織，經常發表香港優先言論，一句「源頭減人」更引來各方喊打之聲，並要投訴佢哋歧視添。不過，范國威未知衰，尋日趁立法會第三日續會動議「年度」議案，要求政府制訂政策時以「港人優先」為依歸，仲力促政府取消「雙非」居港權、收回內地單程證審批權、為個人遊數目「封頂」等十大建議。政府一於好少理，只係派出教育局副局長楊潤雄頂替又跟團考察嘅局長吳克儉充撐場面
（設計對白及圖片）
不過，范、毛嘅火上澆油建議，不但未獲泛民同道中人支持，更被不點名暗批，建制派嘅鍾樹根鬧爆建議係名副其實嘅「爆陰毒」嘅法西斯主義，不但體現唔到港人優先，仲激化中港兩地矛盾。樹根仲質疑咖喱飯（范國威）既然誓死保衞廣東話，以圍頭話質問Gary作為新界議員，又曉唔曉當地方言呢？向來字字珠璣嘅王國興就狠批包括Gary、阿毛等人着埋同一條「港獨」褲，港獨幽靈喺香港上空徘徊陰魂不散。
白鴿黨嘅劉慧卿就不點名批評范國威「踩住啲弱勢社群上」係社會恥辱，認為問題源於政府政策。葉建源亦都話，北區學額緊張源於政府規劃不善，冇掌握將會來港就學學生嘅數據而落得如此下場。一場「辯論」拖拉四小時仍然未有結果，下周三再續。
