政壇：假髮大王開騷省招牌
「假髮大王」趙振國（CK）為旗下髮品廠五十周年慶祝酒會，一眾商界名人出席，貪靚一族嘅「美容天后」曾裕（Joyce）同「美容教主」鄭明明都有到場，並分享「護髮」心得，主人家「假髮大王」趙振國（CK）特別戴咗個度身訂造嘅假髮省招牌，仲透過社交網站上演剪假髮騷，認真夠創意。
趙振國（右）及鄭明明齊戴假髮，演繹扮靚之道。
造型師為趙振國梳剪一個自然而唔誇張嘅假髮造型。
同CK識於微時嘅鄭明明戴咗個六十年代興嘅短鬈假髮，增添氣氛，佢對護髮好着緊，經常佩戴假髮，有時留少少陰，有時駁馬尾，總之將真假髮玩到出神入化。佢笑稱，佢永遠係頭髮第一，每朝起身第一件事就係梳個靚髮型，唔靚就寧願唔出門，事關梳個靚頭見人係禮貌喎。
平時以高貴嘅紮髮形象示人嘅Joyce就以直髮造型現身，唔講仲以為佢戴咗假髮。Joyce笑笑口話，佢一向鍾意百變髮型，所以經常以假髮混上真髮大玩「魔髮」，Joyce仲話，冇頭髮或髮質唔靚仲慘過膚質唔好，事關皮膚唔好可以用粉底遮蓋，但頭髮就好難搞。佢自爆以前髮質唔好，經常長到咁上下就唔再生長，後來經過悉心呵護打理先至有好轉。
