政壇：鄧國威撲火頭穩定軍心

唔計「三堆一爐」，財委會仲有低收入在職家庭津貼撥款等五個議案，然後先輪到審議公務員加薪撥款，望穿秋水下，一啲唔熟悉政府財政程序嘅公務員就憂心忡忡，有人更以為過咗立法年度，累積加薪已經一筆勾銷添，流言傳傳下，殺傷力就愈來愈大，有中低層同事更向鄧國威直接轉達憂慮。

據知鄧國威除咗不時充當社工聆聽同事呻外，上月亦特別發電郵畀公務員，強調加薪會追溯至今年四月一日，不設期限，亦唔會隨立法年度完結而「見財化水」。雖然財委會尋日終於開始通過三堆一爐撥款，但局方亦唔敢抱太大期望，只係有望明年農曆新年前出到筆錢畀同事度過年關。