政壇：泛民議員違規累街坊
火唔燒到自己，就唔知道痛。泛民主派班尊貴立法會議員涉濫用立法會設施，借議員「訪客」之名，帶「雙學」負責人、佔領人士及義工出入立法會大樓，唔單止喺大樓內食飯、沖涼，仲鋪床瞓覺過夜，更疑用上址做佔領行動指揮中心，認真離譜。早前，行管會已向社民連梁國雄、工黨李卓人及民主黨胡志偉發警告，又推出多項措施，點知新招一出，大把人中伏，連同屬泛民陣營嘅「飯盒會」召集人梁家傑都好不忿指：「冤有頭，債有主，一人做事一人當」，佢認為要罰就應該罰嗰三位違規議員喎。泛民鬼打鬼，大事小事都走唔甩！
（設計對白及圖片）
立法會行政管理委員會早前提出三招，以新限制措施趕絕濫用，包括規定議員助理只能留喺所屬辦公室樓層活動，結果惹來泛民及建制派嘅議員助理怨聲載道，不滿妨礙佢哋嘅日常工作，鬧爆嗰啲招待「訪客」嘅議員累街坊。
議助埋怨失出入自由
有議員助理埋怨，佢哋唔淨止服侍議員，仲要處理黨派事務，由於有啲黨派分布喺唔同樓層，有時出入送文件、臨時開會，或遇到突發事件時就好唔方便。如果要處理涉及唔同黨派嘅工作就更加麻煩，要勞煩其他議員助理或立法會職員幫手。其實月前財委會審議新界東北發展前期工程撥款申請時，遇到示威者衝擊立法會大樓，當時行管會亦禁止被捕嘅五名議員助理進入大樓，後來事件平息後才取消有關限制，點知今次嘅措施更棘手。
唔少議員助理都希望快啲取消有關新限制措施，最搞鬼係袋巾傑，佢直頭向三個泛民同事開火，認為要罰就罰嗰三位違規議員，無理由連累所有議員助理受罪喎。火燒到自己，就擒擒青撲出嚟，真係有代議士風采！
