SUN搞作：打橫嚟講：和尚不打傘 也算無法無天
強國最無誠信的官報，日日狂插小島特區，批評嗰度島民自發救島係唔啱嘅！
最唔啱嘅，更係回歸後，仲以為自己管自己，有權話事揀首領，好應乖乖地聽話聽教至啱！
嗰份垃圾官報還搬出一大群不學無術的奴才教授豬噏造謠，作虛弄假，蒙騙強國群眾，講到小島特區再唔聽阿爺話，就會滅島咁嚴重添！
睇番強國啲新聞，笑爆嘴：
話說中央嚴防小島的「擔遮運動」影響鬼域民心，除全監控互聯網之外，還派軍警四出抓人，有藝術家以雨傘作裝置，立刻拉人封艇，咁都未算，喺京城派出所有件副所長爆響口：邊個敢在街上打傘，就抓佢返嚟調查，若着住黑衫嚟擔遮者，唔使審，拉硬！
你話呢個咁嘅強國，係唔係低B呀？嗰班自詡係學者嘅「識字分子」，仍幫腔幫兇，仲係人嚟嘅？
想起嗰日香港差佬頭目向學生民眾狂射胡椒噴霧的解釋，話係見佢哋「有保鮮紙護眼在先」一樣咁反智趴街！
好吖！今劑係「韌啤拿革命」，就拉打傘的人啫！咁如果被封「茉莉花革命」後，是否飲香片都要打鑊甘的呢？因「香片」，就是「茉莉花」也！
許文強在上海灘打傘替馮程程擋雨的經典浪漫鏡頭，咪要剪咗佢，唔准面世？
黃飛鴻出街必備的神級兵器黑布遮係咪要改帶雙節棍呢？
連着乜嘢色衫都係忌諱時，仲衰過明清文字獄，呢個係乜鬼強國呀？
瘋狂世界裏，無和尚打傘，也是「無法無天」了！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
