城中鏡：雅虎「靚媽」炒400人增效率
雅虎嘅廣告業務遲遲未見起色，「靚媽」舵手邁耶嘅壓力可想而知。有報道話，佢今個星期向旗下印度班加羅爾辦公室約四百個職員派「大信封」，但就唔係嫌佢哋幫唔到手，而係因為受影響員工當中超過百分之四十獲邀遠赴美國工作，似乎係想將人才雲集到自己身邊至真。
有說邁耶希望將雅虎團隊聚集起來，以提升效率同創新能力。（資料圖片）
呢四百個被「炒」嘅印度員工佔雅虎總員工人數不足百分之三，但就相當於印度辦公室近三分之一員工。據悉，邁耶希望將雅虎團隊聚集起來，以改善公司嘅產品品質，以及提升雅虎嘅效率同創新能力。雅虎方面就話，將改變班加羅爾營運方式，對特定團隊進行整合，減少辦公室嘅數量。該公司會繼續經營印度市場業務，班加羅爾仍將是一個很重要嘅辦公室。
其實，邁耶要出盡法寶突破當前困局無可厚非，面對Google同facebook呢兩大強敵，雅虎始終未能收窄網上廣告市場嘅距離，唔計夥伴網站收益，上季銷售額下跌百分之二點九，即10.4億美元。上個月，維權投資者Starboard Value更展開狙擊，要求雅虎停止進行收購之餘，更促雅虎考慮分拆或同另一互聯網公司美國在線（AOL）合併。
