城中鏡：塗改液作畫 陳智思練耐性
第一屆香港青年服務領袖獎獎勵計劃日前舉行頒獎禮，喺十三個制服團體中評選出十三位得獎者。身兼計劃榮譽創辦人嘅行政會議成員Bernard陳智思都有現身支持，佢仲自爆細個時都幾頑皮，但又冇乜青少年制服團體可以參加，後來佢讀大學時自創以塗改液作畫，先至培養出耐性同自律性。佢笑笑口話，初初佢畫一張「點畫」用咗三個月，可見少啲耐性都唔得，後來佢學精咗，唔再用咁大張畫紙作畫喎。
陳智思（中）現身支持林月萍（右）同吳潔純（左）有份創辦嘅青年服務領袖獎獎勵計劃。
大福證券前董事總經理黃紹開（右），應黃仰芳（左）邀請出任計劃嘅榮譽顧問。
香港社聯行政總裁蔡海偉（左）呼籲商界多鼓勵員工參與義工服務。
對航空青年團感興趣
Bernard認同青少年參加制服團體可以培養紀律性，唔少僱主亦傾向聘用有參加呢類服務團體嘅人，所以家長應該多啲畀子女參與。原本佢都想畀兩個仔參加，但通常周末都安排晒活動，所以一直未付諸行動。今次活動令佢對十三個制服團體更加了解，佢對航空青年團好感興趣，心思思叫十四歲大仔加入添！
獎勵計劃創辦人Fonia黃仰芳、聯席創辦人Moray林月萍同吳潔純成晚忙出忙入。Fonia話計劃目的係獎勵同培育熱心服務社會嘅十八至三十歲青年領袖，建立由青年主導、商界支持嘅平台，推動「我話事，共創造」嘅核心文化。Moray就話今次全靠一班好友義務幫助先能成事，希望獎項可以延續下去，每兩年舉辦一次。
