政壇：搞搞政：議員憂「木馬屠城」 立會隨時被侵佔
自從佔領行動開展以來，包括社民連「長毛」梁國雄在內嘅泛民主派議員紛紛濫用議會特權，長期借用立法會大樓各層會議室，等示威者入內屈蛇瞓覺休息。有示威者甚至買定大堆食物擺在各樓層雪櫃，又帶埋攬枕同薄被，十足攞正牌咁款。建制派得悉事件後紛紛向秘書處投訴，議員葉劉淑儀更加去信立會主席曾鈺成，要求秘書處正視問題，唔好將立會當成旅館或隨意借宿嘅客棧，但喺泛民仍然死撐話示威者只係二十四小時在立法會開會，傾到攰時就「攤抖」吓啫，無違立法會規定。
設計圖片
昨晚七時許，大批疑是學生或社運人士在立法會大堂排隊登記上五樓會議室樓層。
可憑訪客證任意出入
立會行政管理委員會尋日召開特別會議，初步決定下周三恢復大會，但有建制派議員喺會上反映，擔心如果示威者喺立會持續留宿到下星期三，再喺開大會嗰陣衝入會議廳示威，甚至好似台灣佔領立法院咁佔領立法會，單靠保安未必足以應付，屆時可能又要警方入內執法。
行管會委員「象哥」黃定光更批評，示威者入立會開會討論佔中已經好有問題，仲要喺會議室瞓晒喺度，成何體統。佢又話由於示威者依家可憑訪客證隨意出入立會，如果佢哋喺下周三開會時衝落會議廳示威，或同外面嘅示威者來個裏應外合，耍手段放出面啲示威者入去增援，只會重演「木馬屠城記」嘅悲劇，由佔領金鐘變成佔領立法會。
守則無列明離開時限
又難怪建制派擔心嘅，先前反對東北發展計劃嘅人士衝擊立法會搞到咁大鑊，若果呢場現代版嘅「木馬屠城記」上演，後果不堪設想。
曾鈺成喺行管會會議後話，由於依家啲訪客守則無列明訪客離開立法會嘅時限，加上各個樓層的會議室理論上二十四小時開放，只要議員跟足程序申請，秘書處無理由拒絕。
不過，曾鈺成無正面回應立法會有無足夠保安處理大樓內所有示威行為，只係話議員要為訪客嘅行為負責，行管會下周一會再開會討論事件。
