政壇：微軟前CEO開展退休7大目標
微軟前行政總裁保曼，今年先後辭去公司行政總裁同董事個位，你以為IT人退休之後就會過啲逍遙自在嘅生活？錯啦，佢最近接受《福布斯》雜誌十月號嘅封面人物訪問，就話要展開新嘅人生旅程，當下更有七大目標，第一樣就係好似蓋茨咁，成立自己嘅慈善事業，形容係人生嘅第二春。
保曼話希望好似蓋茨咁，成立自己嘅慈善事業。（資料圖片）
保曼喺微軟工作咗三十五年，以五十八歲之齡坐擁二百二十五億美元身家，排喺《福布斯》富豪榜第十八位，啱啱就喺華盛頓州的Bellevue租咗層喺四十樓嘅超級公寓，景觀開揚，可以睇晒成個西雅圖同雷尼爾山嘅全景。保曼接受訪問時話自己退休之後，新任CEO納德拉依家逐步調整公司嘅策略，可能久唔久先同佢聯絡一次。為咗令自己退休後唔會太得閒，佢就話為自己定咗七樣嘢要做。
由最小嘅事數起，第一樣就係健身；之後就要打好啲Golf（因為傳聞佢係福布斯富豪榜入面打Golf數一數二最差嗰位）；第三就係以股東身份去睇住佢持有嘅3.33億股微軟股份（唔通會好似伊坎咁，適當時叫CEO做分拆？）；第四，就係學新嘢，如學習希伯來語，因為身為猶太人嘅佢，細個原來冇行過成人禮。
講完小嘅事，開始輪到大事啦，相信大家都記得，保曼之前以二十億美元買咗NBA洛杉磯快艇隊，幾乎人人話貴，但佢仍然覺得係物有所值；同樣重要嘅係，原來保曼都想好似蓋茨咁，建立自己嘅慈善事業，所以就聯同太太Connie一齊開始同各類人打交道，睇吓自己啲錢可以為社會做到啲咩。雖然佢仲未成立自己嘅基金會，但不想好似股神巴菲特咁將錢交由蓋茨基金會打理就算，而係想自己行出一條路，出錢又出力！
