立法會十八個事務委員會同財務委員會轄下兩個小組委員會今日開會選舉正副主席,但由於泛民主派單方面破壞同建制派嘅協調機制,玩突襲傾巢派人加入人事編制同工務兩個小組委員會,圖搶走主席寶座,兩派議員尋日就喺立法會爆發連場罵戰,建制派指摘泛民背信棄義,泛民就批評建制派囂張跋扈。

設計圖片及對白

建制派尋日朝早召開秘密會議商討對策,決定只係將衞生同福利事務委員會分別讓路畀衞生服務界李國麟同社福界張國柱兩名泛民議員,其餘十六個事務委員會嘅正副主席職位將會搶到盡。議員Ann蔣麗芸開會後率先開火鬧爆泛民背信棄義,破壞行之有效嘅協調機制,又批評泛民擺明係無信用,建制派以後都唔會再同泛民協調咁話。

不過,飯盒會召集人「袋巾傑」梁家傑就反駁話,雙方原本協議所有委員會正副主席「一人一半」,但建制派成日恃住人多蝦人少,搶盡大部分委員會話事權,搞到泛民好似成日被人「食住」,所以決定放棄原先協調,喺所有事務委員會上派人搶位,亦唔會容許建制派喺截止後再報名加入人事編制同工務小組委員會。

或要求財委會介入

被指喺協調上失職嘅葉國謙亦反駁,話建制派從來都無同泛民協議「一人一半」,又話大家一早已經講明保安、政制、司法同交通四個委員會無得協調。至於人事編制同工務小組委員會「失守」點收科?佢透露,建制派會繼續要求加入兩個小組委員會,如果泛民真係拒絕,佢哋會要求財務委員會介入事件,透過表決就一定穩操勝券喎。

第一手消息請下載on.cc東網iPhone/iPad/Android/Windows Phone Apps