籃球場烏煙瘴氣 房屋署癡癡呆呆

話說九龍灣新落成嘅啟晴邨籃球場月前啟用，照計新增體育設施應該捧場者眾o架，點知啱啱相反，居民對球場怨聲載道。原來呢個球場起喺商場平台，位置咁啱對正食肆廚房嘅大型排氣口，油煙味充斥，落場運動等於做「人肉抽油煙機」，你話房署搞啲咁嘅設計嚟獻世，係咪食多咗坑渠油變白癡加腦殘吖？

啟晴邨位處市區中心地段，寸土尺金，因地制宜將球場建喺商場平台唔係問題，弊在港產官僚唔知黐咗邊條筋，竟然求其搵塊空地起個球場喺度就算數，周圍環境適唔適合做運動，一於少理，關人個關，卒之咪撞晒板囉。

有籃球愛好者話，去過球場一次已經冇返轉頭，甜、酸、苦、辣「四味夾攻」，落場一陣喉嚨已經頂唔順，「繼續打落去真係同慢性自殺冇分別！」嗱，呢位仁兄講得一啲冇誇張o架，家庭醫生亦警告話，油煙同廢氣都會刺激氣管，容易令做緊劇烈運動者氣促或引發哮喘，如果有隱疾，更可能增加猝死機會，長期吸入油煙會令患癌風險增加。

打波跑步本來係為咗強身健體，家陣居然變咗搵自己條命較飛，你話房署係咪靠害吖。署方回應查詢時話，球場啟用以來使用率唔高，至今亦冇收過相關投訴喎。梗係喇，咁嘅腦殘設計，係人都敬而遠之，避之則吉，唔通真係壽星公吊頸，嫌命長咩。

最搞笑就係，房署呢頭話食肆排氣口離地面五米，符合環保署嘅規定，嗰頭又自打嘴巴，話「為進一步改善現狀」，會喺排氣口加設屏風，改變氣味嘅散播方向喎。嗱嗱嗱，咁講即係變相認衰，承認以前嘅設計有欠完善喇！

講開又講，啟晴邨落成短短一年幾，負面新聞不絕如縷，除咗轟動全城嘅槍擊案同埋倫常慘劇外，多數都同建築設計有關，例如新建玻璃升降機通風不足熱過焗爐，信箱位置過高玩殘住戶等等。計太一叮話齋，泥水佬造門，過得人過得自己，房署班官最好輪流去啟晴邨住番一頭半個月，「享受」番自己啲腦殘傑作，以便改善設計，無謂再累人累物累街坊喇，叮！